Ndikhumbul' izolo ulim' izongo
Uhamba no Zola nilungiselel' ingomso
Uxhabash' ok' xhabashekayo,
Ukuz' uxethul' ok' xethulekayo.

Ngorhatya amaphiko uburhuqela ngasekhaya
Ubuy' usiza ku Nokhaya,
Nibuye niqulunqe ukukhanya.
Ewe kaloku akuyonto ngaphandle kwekhaya.

Lizongomile lagqekreza eMthatha,
Lath' kanti liyamthatha.
Libashiya bematshekile abamthandayo
Bezizithulu abamvayo,
Satsho sandikhahlela kwele ntandabuzo

Ewe kaloku akukho nzwana ingenasiphako.
Kodwa hayi ukuhamba ungenamphako,
Ingakumbi kweli xesha
Xesha lika msina ndozele

Xesha lixheshile amaqhaw' aqhezukile
Izithwalandwe zandwendwela zinodaka
Amakroti akrabalaza ngomzabalazo
Bakhuz' abakhozi bazuz' inkululeko

Awu madoda,
Wazimela uMazaleni esondela kooSoga,
Wadlula ngendlela edlalela ngakooNdlela.
Khwaphuncuk' itiki yetikili kooMtika
Yhini!! Sigilan' ebumnyameni Gilana?
Yhini!! Ukuginya ubukrakra Mkrakra?